अक्सिजन नपाएर जनता मरिरहेका बेला विवादास्पद व्यापारीको घरमा ओली–नेपालको वार्ता, कुरा मिल्यो
काठमाडौं । एमालेका अध्यष समेत रहेका कामचलाउ सरकारका प्रधानमन्त्री खड्गप्रसाद ओली र वरिष्ठ नेता माधव नेपालबीच भएको वार्ता वार्ता सकारात्मक भएको छ ।
काठमाडौंको चपली हाइटस्थित विवादास्पद व्यापारी रामेश्वर थापाको घरमा ओली र नेपालबीच भएको वार्तामा सहमति भएको हो ।
वार्ताका लागि व्यापारी थापाले व्यवस्था मिलाइदिएका थिए । थापाले हेलिकप्टर, जग्गा लगायतको कारोबार गर्छन् ।
वार्तापछि सम्वाददाताहरूसँग कुरा गर्दै नेता नेपालले २०७५ को जेठ २ गते फर्किनेबारेमा ओली सकारात्मक देखिएको बताएका छन् ।
वार्ता सकारात्मक भएकाले आफूनिकट २० जना सांसदले दिने भनिएको राजीनामा दुई–चार दिनलाई टरेको वरिष्ठ नेता नेपालले बताए ।
नेता नेपाल आफूले राखेको ६ बुँदे प्रस्ताव र २ जेठ ०७५ मा फर्किनेबारेमा छलफल भएको बताए । उनले फेरि वार्तामा बस्ने सहमति भएको पनि बताएका छन् ।
नेपाल समूहले ०७५ सालको जेठ २ गते कै अवस्थामा पार्टीलाई फर्काउनुपर्ने अडान लिइरहेको छ ।
त्यही अडानका बीच नेपाल समूहले समानान्तर गतिविधि चलाएको थियो ।
ओलीले यसअघि बिहीबार बालुवाटारमा एमालेको स्थायी कमिटीको बैठकबाट चार नेताहरू कारबाही फुकुवा गरेका थिए ।
वरिष्ठ नेता नेपाल, भीम रावल, सुरेन्द्र पाण्डे र घनश्याम भुसालमाथिको कारबाही फुकुवा गर्ने निर्णय गरेको थियो ।
जनताले अक्सिजन नपाएर मरिरहेका बेला ओली र नेपाल भने विवादास्पद व्यापारीको घरघर चहार्दै वार्ता गरिरहेका छन् ।
फेसबुकबाट तपाईको प्रतिक्रिया