काठमाडौं । सशस्त्र प्रहरी बलको मुख्यालयको लेखा शाखाको आगलागीमा संलग्न रहेको भन्दै प्रहरीले थप एक सशस्त्र प्रहरीलाई पक्राउ गरेको छ ।

महानगरीय अपराध महाशाखाको टोलीले सइ हुमबहादुर थापालाई पक्राउ गरेको हो ।

प्रहरीले केही दिन अघि मात्र सशस्त्र प्रहरीका हवल्दार रामकृष्ण श्रेष्ठलाई पक्राउ गरी अनुसन्धान गरिरहेको छ । प्रहरीको अनुसन्धानमा श्रेष्ठले अख्तियारको अनुसन्धानमा रहेका कागजपत्र नष्ट गराउन आगलागी गरेको खुलेको थियो ।

गत सोमबार राति एक बजे मुख्यालयको लेखा शाखामा आगलागी भएको थियो । पक्राउ परेका थापा मुख्यालयको लेखा कार्यालयमा काम गर्ने र संलग्नता देखिएकाले पक्राउ गरेको महाशाखाका प्रमुख एसएसपी दिवेश लोहनीले जानकारी दिए ।

गृह मन्त्रालयका सहसचिव कृष्ण राउतको नेतृत्वमासमेत आगलागीबारे छानबिन गर्न समिति गठन गरिएको छ । आगलागीका कारण अख्तियारको छानबिनका क्रममा रहेका महत्वपूर्ण कागजपत्र नष्ट भएका छन् ।