काठमाडौं । राष्ट्रिय ईसाई समाज राष्ट्रिय एकता केन्द्र नेपालले वाम गठबन्धनका एमाले र माओवादी केन्द्रका उम्मेदवारहरूलाई मतदान गर्न अपील गरेको छ ।

ईसाई समाजका पूर्व महासचिव रामप्रसाद न्यौपानेले कात्तिक ८ गते अपील जारी गर्दै समाजको लेटरप्याडमा एमाले र माओवादी केन्द्रका उम्मेदवारहरूका पक्षमा मतदान गर्न निर्देशन दिएका हुन् ।

‘मंसिर १० र २१ गते हुन लागेको प्रतिनिधि र प्रदेश सभाको निर्वाचनमा धार्मिक स्वतन्त्रता, राष्ट्रियता र दिगो विकासका लागि ऐतिहाँसिक वाम गठबन्धनका प्रत्यक्षतर्फका उम्मेदवारका लागि गोलो घेराभित्रको हसिँया हथौडा र सूर्य चिन्हमा मतदान गर्न देशैभरि रहेका क्रिश्चियन समुदाय, (चर्च)का पास्टर, अगुवा तथा सम्पूर्ण विश्वासी सदस्यहरूमा अपील गर्छु’, न्यौपानेले भनेका छन् ।

नेपाललाई हिन्दू राष्ट्रबाट हटाएर धर्मनिरपेक्ष गर्न मद्दत गरेको भन्ने आरोप एमाले र माओवादी केन्द्रलाई लागि रहेका बेला क्रिश्चियनहरूले वामपन्थीहरूलाई जिताउन गोप्य रुपमा अभियान चलाएका हुन् ।

यो सर्कुलरले नेपाली कांग्रेससहितका लोकतान्त्रिक शक्तिहरू धर्मको आडमा विदेशीसँग पैसा खाएर कुनै पनि गतिविधि गर्दैनन् भन्ने पुष्टि हुन्छ ।

हुन त तत्कालीन सभामुख तथा एमालेका नेता सुवासचन्द्र नेम्वाङले क्रिश्चियनहरूसँग ठूलो परिणाममा पैसा खाएर अन्तरिम संविधानमा धर्मनिरपेक्ष शब्दावली राखेको आरोप लाग्दै आएको छ । यो विषयमा नेम्वाङले स्पष्ट रुपमा केही बताउन सकेका छैनन् ।