हलेसी । संगठनको काममा जाने क्रममा नेपाल तरुण दलका अध्यक्ष विद्वान गुरुङसहितका तरुण नेताहरूले खोटाङ जिल्लामा रहेको हलेसी महादेवको पूजाअर्चना गरेका छन् ।

शुक्रबार बिहान अध्यक्ष गुरुङले हलेसी महादेव र सँगै रहेको बौद्ध गुम्बामा पूजा गरेका हुन् । त्यस क्रममा गुरुङसँगै तरुण नेताहरूको पनि सहभागिता रहेको थियो ।

मंसिर २९ र ३० गते भोजपुरमा हुन गैरहेको नेपाल तरुण दलको कोशी प्रदेश सम्म्लेनलाई सम्बोधन गर्न खोटाङ हुँदै अध्यक्ष गुरुङ भोजपुर जान लागेका छन् । सोही क्रममा हलेसी महादेव र सँगै रहेको बौद्धको गुम्बामा दर्शन गरेका हुन् ।

कोशी प्रदेशअन्तर्गतका तरुण दलका केन्द्रीय सदस्य एवं जिल्ला अध्यक्षहरू सहभागी हुने उक्त सम्मेलनमा अध्यक्ष गुरुङसँगै केन्द्रीय सदस्य एवं जिल्ला अध्यक्षहरू भोजपुरतर्फ प्रस्थान गरेका छन् ।

खोटाङमा रहेको हलेसी महादेवको मन्दिर पूर्वको पशुपतिनाथ भनेर प्रशिद्ध रहेको छ । हलेसीमा महादेवको मन्दिरसँगै बौद्ध गुम्बा पनि रहेको छ । हिन्दु र बौद्ध धर्मको अदभूत धार्मिकस्थलका रुपमा हलेसीलाई लिने गरिन्छ ।