मुगु । नेपाली कांग्रेस १५औं नियमित महाधिवेशन अन्तर्गत नेपाली कांग्रेस मुगुको जिल्ला अधिवेशनले सभापतिसहितको नयाँ कार्यसमिति निर्वाचित गरेको छ ।

नेपाली कांग्रेस मुगुको जिल्ला अधिवेशनबाट जिल्ला सभपातिमा तिलकबहादुर मल्ल निर्वाचित भएका छन् । शेरबहादुर देउवा पक्षीय नेताहरूले मुगुमा वडा अधिवेशन हुँदै जिल्ला अधिवेशन गरेको छ ।

शनिबार सम्पन्न जिल्ला अधिवेशनबाट मल्ल सर्वसम्मत जिल्ला सभापतिमा निर्वाचित भएका हुन् ।

आकांक्षी खगेन्द्र मल्ल पार्टीलाई जिल्लामा थप मजबुत बनाउने भन्दै पछि हटेपछि मल्ललाई सर्वसम्मत जिल्ला अध्यक्ष चयन गरिएको कांग्रेस नेता धर्मराज शाहीले जानकारी दिए ।

अधिवेशनबाट २७ सदस्यीय जिल्ला कार्यसमिति चयन गरिएको छ । देउवा पक्षले कर्णालीका हिमाली जिल्लाहरूमा जिल्ला अधिवेशन सम्पन्न गरिसकेको छ ।

कांग्रेसको देउवा पक्षले हुम्लामा सूर्यबहादुर शाही र जुम्लामा नेत्रकला शाहीलाई जिल्ला सभापतिमा चयन गरिसकेको छ ।