काठमाडौं । गायक एवम् संगीतकार भुपु पाण्डेले ‘माया खै’ बोलको गीत रिलिज गरेका छन् ।

आफ्नै शब्द रहेको गीतको म्युजिक भिडियोमा जुना विश्वकर्माले गायक पाण्डेलाई साथ दिएकी छिन् । गीतमा पवित्रा गुरुङको पनि स्वर रहेको छ ।

वियोगान्त मायाप्रेमको कथा र शब्द गीतमा सुन्न र देख्न पाइन्छ । आधुनिक लोक लयमा रहेको गीतमा गाउँको मायाप्रेमलाई भिडियोमा देखाइएको छ । म्युजिक भिडियोमा मन पराएको मान्छे गुमाउनु परेको पीडालाई देखाइएको छ ।

गायक पाण्डेले गाउँका युवाहरूको समस्या र समाजको पीडालाई गीतमा देखाउन खोजिएको बताए । उनले भने, ‘माया प्रेमलाई सरल भाषामा देखाउन खोजिएको छ । केटो कमाउन विदेशमा गएपछि आफूले रुचाएको केटी गुमाउनु परेको पीडा खाइएको छ ।’

गायक पाण्डेले हरेक गाउँमा देखिने समस्या र पीडालाई आफूले गीत र म्युजिक भिडियोमार्फत देखाएको बताए । भिडियोमा गायक पाण्डेले पनि अभियन गरेका छन् ।

गायक पाण्डेले म्युजिक भिडियोलाई दाङको बंगलाचुली गाउँपालिकाको दार्मामा गराएका छन् । गीतको अवधारणा, निर्माता र निर्देशन गायक पाण्डे नै हुन् ।