गौशालाबाट जुनु पक्राउ

काठमाडौं । कुवेत पठाइदिन्छुभन्दै रकम ठगी गरेको अभियोगमा प्रहरीले ४३ वर्षीया जुनु तुम्बाहाङफेलाई पक्राउ गरेको छ ।

कुवेत पठाइदिन्छु भन्दै २ लाख रूपैयाँ ठगी गरेको अभियोगमा तेह्रथुम म्याङलुङ नगरपालिका–२ घर भई काठमाडौं महानगरपालिका–८ गौशाला बस्ने जुनुलाई सोमबार दिउँसो प्रहरीले पक्राउ गरेको विज्ञप्तिमार्फत जनाएको छ ।

जुनुले १ जनालाई वैदेशिक रोजगारीका लागि कुवेत पठाई प्रतिष्ठित कम्पनीमा मासिक १ लाख रूपियाँ तलबमा काम लगाइदिन्छु भनेर ठगी गरेकी थिइन् ।

जुनुले प्रलोभनमा पारी पीडितबाट पटक पटक गरी उक्त रकम ठगी गरेकोले काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरीले गौशालाबाट पक्राउ गरेको जनाएको छ ।

जुनुलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको छ ।

Published : Wednesday, 2024 January 3, 6:58 am