काठमाडौं । जनता समाजावादी पार्टी, नेपालले माघ ११ गते हुने राष्ट्रिय सभा निर्वाचन प्रयोजनका लागि दल दर्ता गर्ने निर्णय गरेको छ ।

सोमबार दिउँसो पार्टी केन्द्रीय कार्यालय, बालकुमारी, ललितपुरमा बसेको केन्द्रीय कार्यकारिणी समितिको बैठकले निर्वाचन आयोगमा दल दर्ताको निर्णय गरेको नेता राजकिशोर यादवले बताएका छन् ।

राष्ट्रियसभा निर्वाचनमा पार्टीको तर्फबाट उम्मेदवार चयनका लागि पुस १० गते केन्द्रीय कार्यकारिणी समितिको पुन: बैठक बस्ने निर्णय गरेको छ ।

कार्यकारिणी समितिले पुस २५, २६ र २७ गते जसपा नेपालको राजनीतिक समितिको बैठक आह्वान गरेको छ ।

जसपा नेपालले सञ्चालन गरेको तीन महिने संगठन विस्तार तथा सुदृढीकरण अभियानको समिक्षा गर्दै अभियानलाई पुस मसान्तसम्म थप प्रभावकारी ढंगले निरन्तरता दिने निर्णय गरेको छ ।

समसामयिक राजनीतिक विषयमा छलफल गर्दै जसपा नेपालले यसबीच संचालन गरेको प्रदेशस्तरीय प्रशिक्षक प्रशिक्षण अभियान प्रभावकारी रहेको निष्कर्ष समेत निकालेको छ ।