भैरहवा । रुपन्देही प्रहरीले ११ लाख ८२ हजार मूल्य बराबरको ५६ बोरा चिनीसहित गाडीलाई नियन्त्रणमा लिएको छ ।

ईलाका प्रहरी कार्यालय बेथरीबाट खटिएको प्रहरी टोलीले बुधबार बिहान २ बजे मायादेवी गाउँपालिका वडा नं. ५ पर्सहवाबाट गाडीलाई चिनीसहित नियन्त्रणमा लिएको विज्ञप्तिमा उल्लेख छ ।

चिनी बरामद भएको बोलेरो पिकअप गाडीलाई बुटवल उप–महानगरपालिका वडा नं. २ बस्ने वर्ष ३२ का ईश्वर भुसालले चलाएका थिए । गाडीमा बुटवल उप–महानगरपालिका वडा नं. १३ बस्ने वर्ष २० को अर्जुन कुँवर पनि सवार थिए ।

लु २ च २४ नम्बरको बोलेरो पिकअप गाडीमा भारतबाट नेपालतर्फ अबैध रुपमा भन्सार छली चोरी पैठारी गरी ल्याउँदै गरेको अवस्थामा ५६ बोरा चिनी बरामद भएको थियो ।

चिनीसहितको गाडी र पक्राउ परेका दुबै जनालाई प्रहरीले भैरहवा भन्सार कार्यालय बेलहिया पठाएको छ ।

नेपालका चिनी उद्योगीहरूले भारतबाट चिनी तस्करी गरेर ल्याइ आफ्नो उद्योगको लेबल लागेको बोरामा भरेर बजारमा महँगो मूल्यमा पठाउने गर्छन् ।

स्वदेशी चिनी मिललाई धरासायी बनाएर व्यापारी र उद्योगीहरूले चिनीमा लामो समयदेखि तस्करी र कालोबजारी गर्दै आएका छन् ।