चन्द्रौटा । नेपाली कांग्रेस कपिलवस्तु–३ मा महासमिति सदस्य छनोटमा धाँधली भएपछि पुन: निर्वाचनको मागसहित पार्टी केन्द्रीय कार्यालय सानेपामा उजुरी परेको छ ।

पार्टी विधानविपरीत महासमिति सदस्य चयन गरिएको भन्दै आधा दर्जन महाधिवेशन प्रतिनिधिले पुनर्निर्वाचनको माग गरेका हुन् ।

कांग्रेसको १४औँ महाधिवेशनका प्रतिनिधिसँग सल्लाह नै नगरी महासमिति सदस्य बनाइएपछि विरोध भएको छ ।

केन्द्रीय सदस्य रूपा बिकको उपस्थितिमा क्षेत्रीय सभापति ब्रह्मानन्द उपाध्याय, महाधिवेशन प्रतिनिधि वीरेन्द्र कनौडियालगायतले एकपक्षीय रूपमा महासमिति प्रतिनिधि छनोट गरेका छन् । बिकसहितको समूहले बलमिच्याइ गरेर आफू निकटकालाई मात्रै महासमिति सदस्य बनाएका छन् ।

पूर्वसांसद अभिषेकप्रताप शाहसहितका नेताहरूले महासमिति सदस्यका लागि पुन: निर्वाचन हुनुपर्ने माग गरेका छन् ।

दलित कोटाबाट महाधिवेशन प्रतिनिधि र केन्द्रीय सदस्य बनेकी बिकले अहिले खुल्ला महिला क्लस्टरमा आफूलाई विधानविपरीत सिफारिस गरेको निवेदनमा उल्लेख छ ।

पार्टी कार्यालयमा उजुरी हाल्नेमा महाधिवेशन प्रतिनिधि अभिषेकप्रताप शाह, कमलबहादुर क्षेत्री, सुशीला बेल्वासे, नैनकला रेग्मी, प्यारमोहम्मद मियाँ, राधिका मालीलगायत छन् ।

उनीहरूले क्षेत्रीय सभापति उपाध्यायले टिकट वितरणमा आकांक्षीहरूसँग पैसा लिएको भन्दै आवश्यक परे प्रमाण पेस गर्ने नेपाली कांग्रेसको केन्द्रीय कार्यालय सानेपामा दर्ता भएको पत्रमा उल्लेख छ ।