काठमाडौं । नेपाली कांग्रेसका सांसद समेत रहेका राज्य व्यवस्था तथा सुशासन समितिका सभापति रामहरि खतिवडाले नेपाल एयरलाईन्सको टिकट निकै महँगो रहेको गुनासो गरेका छन् ।

शुक्रबार प्रतिनिधिसभाको बैठकमा शून्य समयमा बोल्दै खतिवडाले भने, ‘नेपाल एयरलाईन्सका टिकटहरू महँगा छन् । कालोबजारीमा बिक्री भइरहेका छन् ।’

‘नेपाल एयरलाईन्स ४८ अर्बभन्दा धेरैको घाटामा छ’, उनले भने, ‘यसका बारेमा सरकारको ध्यान जाओस् र नेपाल एयरलाईन्सलाई सरकारको एयरलाईन्स बनाओस् ।’

‘नत्र भने यो मागी खाने दुहुनो गाई भएको छ । घाँस हाल्न नपर्ने, सहोर्न नपर्ने, दुध मात्रै दुहुने प्रवृत्ती अन्त्य गरोस् धन्यावाद’, सभापति खतिवडाले भने ।

निकै घाटामा रहेको नेपाल एयरलाईन्सले जहाज किन्ने तयारी गरेको छ । जहाज किन्न पाँचतारे होटल सोल्टीको सेयर बिक्री गरेर लगानीको तयारी भइरहेका बेला कांग्रेसका सांसद खतिवडाले सचेत गराएका छन् ।

संस्कृति, पर्यटन तथा नागरिक उड्डयनमन्त्री सुदन किराँतीले जहाज किन्न निगमका सम्पत्ति बेच्न षड्यन्त्र गरिरहेका बेला खतिवडाले सबै खेलाहरू उदाङ्गो बनाइदिएका छन् ।