काठमाडौं । सर्वोच्च अदालतको परमादेशबाट गठन भएको एमालेको कोशी प्रदेशको सरकार विश्वासको मत पाउन नसकेर ढलेको छ ।

मुख्यमन्त्री हिकमत कार्कीले शनिबार विश्वासको मत लिने कार्यक्रम थियो । विश्वासको मत नपाउने भएपछि कार्कीले मुख्यमन्त्री पदबाट राजीनामा दिएका हुन् ।

कार्कीले मुख्यमन्त्री पदबाट राजीनामा दिएपछि प्रदेश प्रमुख परशुराम खापुङले नयाँ सरकार गठनका लागि प्रदेशसभा सदस्यहरूलाई आह्वान गरेका छन् ।

प्रदेश प्रमुख खापुङले ६ दिनको समय दिएर प्रदेशसभा सदस्यहरूलाई सरकार गठनका लागि दाबी पेश गर्न आह्वान गरेका हुन् ।
खापुङले संविधानको धारा १६८ (५) बमोजिम प्रदेशसभामा विश्वासको मत प्राप्त गर्न सक्ने प्रदेशसभा सदस्यलाई सरकार गठनका लागि दाबी गर्न असोज २६ गते अपराह्न ५ बजेसम्मको समय दिएका छन् ।

९३ सदस्यीय प्रदेशसभामा सरकार गठनका लागि ४७ जना सांसदको समर्थन आवश्यक पर्छ । प्रदेशसभामा एमालेका उप–सभामुखबाहेक ३९, नेपाली कांग्रेसका २९, नेकपा (माओवादी केन्द्र)का १३, राप्रपाका ६, नेकपा (एकीकृत समाजवादी)का ४ र जसपाका १ सांसद छन् ।

कार्की भदौ २२ गते मुख्यमन्त्रीमा नियुक्त भएका थिए । विश्वासको मतका लागि कार्कीलाई ४७ सांसदको आवश्यक थियो ।

अघिल्लो पटक मुख्यमन्त्री भएका नेपाली कांग्रेसका उद्धथ थापाले विश्वासको मत पाउने भएपछि एमालेकी उप–सभामुख सिर्जना दनुवार बिरामी भएको नौटंकी गरेर अस्पताल भर्ना भएपछि राजनीतिले नयाँ मोड लिएको थियो ।

उद्धव थापाले विश्वासको मत लिए पनि एमालेले सर्वोच्च अदालतमा रिट दायर गरेर परमादेश ल्याएर कार्कीलाई मुख्यमन्त्री बनाएको थियो । एमालेले विभिन्न खालका कीर्ते गर्दा पनि मुख्यमन्त्री पद दोस्रो पटक बचाउन सकेको छैन ।