काठमाडौं । लामो समयदेखि तनावपूर्ण अवस्थामा रहेको नेपाली कांग्रेसको क्रियाशील सदस्यताको विवाद मिल्ने बाटोतिर गएको छ ।

ललितपुरको सानेपामा शुक्रबार बसेको पदाधिकारी तथा शीर्ष नेताहरूको बैठकमा क्रियाशील सदस्यताको नामलाई छानविन गरेर मिलाउने सहमति भएको छ ।

देशभरिबाट प्रक्रिया पूरा गरेर आएको क्रियाशील सदस्यको नामलाई समावेश गर्ने सहमति जुटेको छ ।

सहमतिमा नवीकरण हुने क्रियाशील सदस्य र नयाँ सदस्यको छनौटको प्रक्रिया हेरी छानबिन समितिले निर्णय गर्न सक्ने गरी मापदण्ड बनाइएको छ ।

विभिन्न पार्टीबाट नेपाली कांग्रेसमा आएकाहरूमा जिल्लादेखि सबै प्रक्रिया पूरा गरेर आएको नाम स्वीकृत गर्ने पनि सहमति भएको छ ।

प्रदेश जिल्ला र वडास्तरमा विवाद नै कायम रहेको क्रियाशील सदस्यको नाममा एकपटक सहमति जुटाउन प्रयास गर्ने सहमति हुन नसके छानबिन समितिले आवश्यक प्रक्रिया र कागजपत्र हेरेर निर्णय गर्न सक्ने पनि बैठकमा सहमति जुटेको छ ।

महाधिवेशन आउन दुई महिनाभन्दा कम समय बाँकी रहेका बेला कांग्रेसको क्रियाशील सदस्यताको टुंगो लाग्न सकेको थिएन ।