काठमाडौं । सर्वोच्च अदालतका प्रस्तावित न्यायाधीशहरूविरुद्ध आठ वटा उजुरी परेको छ ।

कात्तिक ९ गते संसदीय सुनुवाइ समितिले सर्वोच्च अदालतका लागि प्रस्तावित चार न्यायाधीशविरुद्ध उजुरी आह्वान गरेको थियो । शुक्रबारसम्म आठ वटा उजुरी परेका हुन् ।

प्रस्तावित न्यायाधीशहरूमा उच्च अदालत पोखराका मुख्य न्यायाधीश रत्नबहादुर बागचन्द, उच्च अदालतका न्यायाधीशहरू चन्द्रबहादुर सारू, जनक पाण्डे र गोकर्ण डाँगी छन् ।

प्रस्तावित न्यायाधीशहरूविरुद्ध उजुरी दिने समय कात्तिक १९ गतेसम्म रहेको छ । असोज २० गते बसेको न्याय परिषद्को बैठकले उच्च अदालतका चार न्यायाधीशलाई सर्वोच्च अदालतको न्यायाधीशमा सिफारिस गरेको थियो ।

पाण्डे उच्च अदालत, पाटनको हेटौंडा इजलासका न्यायाधीश हुन्, भने सारू उच्च अदालत पाटनका न्यायाधीश हुन् । डाँगी यसअघि उच्च अदालत, जनकपुरको अस्थायी इजलास वीरगञ्जका न्यायाधीश थिए ।

उनीहरूविरुद्ध परेको उजुरी अध्ययन गरेर संसदीय सुनुवाइ समितिले न्यायाधीशमा सिफारिस चारै जनाको कार्ययोजना सुन्नेछ ।