वीरगञ्ज । बारा जिल्लामा आधारभूत अस्पतालको उद्घाटन गर्ने क्रममा झडप हुँदा प्रहरीले चलाएको गोली लागेर घाइते भएका युवकको बारेमा स्थलगत छानबिन गर्न एसएसपी नेतृत्वमा छानबिन टोली गठन गरिएको छ ।

मधेस प्रदेश प्रहरी कार्यालय, जनकपुरले एसएसपी प्रभुप्रसाद ढकालको नेतृत्वमा छानबिन टोली गठन गरेको हो । कात्तिक १४ गते बाराको फेटा गाउँपालिका–३ मा निर्माण गरिएको आधारभूत अस्पतालको भवन उद्घाटन गर्ने क्रममा झडप हुँदा प्रहरीको गोली लागेर अदित्य पासवान घाइते भएका छन् ।

ढकालसँगै टोलीमा नेपाल प्रहरीका एसपी भुनेश्वरप्रसाद साह र प्रहरी निरीक्षक जटाशंकर यादव सदस्य रहेका मधेश प्रदेश प्रहरी कार्यालय प्रमुख डीआईजी ओमप्रसाद अधिकारीले बताएका छन् ।

टोलीले फेटामा भएको झडप र प्रहरीले गोली चलाउनु परेको अवस्थाको बारेमा स्थलगत छानबिन गरी प्रतिवेदन पेस गरेपछि मात्रै थप कुरा भन्न सकिने डीआईजी अधिकारीले बताए ।

प्रहरीले चलाएको गोली लागेर कार्यक्रमका लागि टेण्ट खडा गर्ने र कुर्सी मिलाउने कार्य गरिरहेका स्थानीय धर्मेन्द्र पासवानका छोरा अदित्य पासवान गम्भीर घाइते भएको भएका छन् ।

पेटमा गोली लागेर गम्भीर घाइते भएका पासवानलाई वीरगञ्जस्थित नेशनल मेडिकल तथा शिक्षण अस्पतालमा उपचार भैरहेको छ ।

फेटा गाउँपालिका प्रमुख रुस्तम अंसारीले उपचारका लागि चाहिने उपकरण र चिकित्सक जनशक्तिको व्यवस्थापनबिना नै राष्ट्रिय स्वतन्त्र पार्टी (रास्वपा)की सांसद मीक्षा बास्कोटालाई बोलाएर शिला लेखमा नाम लेखाउनका लागि अस्पताल भवनको उद्घाटन गराउन लागेको भन्दै स्थानीयहरूले विरोध प्रदर्शन गरेका थिए ।

स्थानीयहरूले विरोध प्रदर्शन गर्दा उदघाटन कार्यक्रमलाई स्थगित गर्नुको साट्टो गाउँपालिका प्रमुख रुस्तम अंसारीले इलाका प्रहरी कार्यालय प्रसौनी गण्डकका प्रहरी निरीक्षक सुमन लामा नेतृत्वमा प्रहरी बोलाएर गोली चलाउने लगाएको आरोप पीडितहरूले लगाएका छन् ।

घटनापछि इलाका प्रहरी कार्यालय प्रसौनीका कार्यालय प्रमुख प्रहरी निरीक्षक सुमन लामालाई जिम्मेवारीबाट मुक्त गरिएको छ । लामालाई जिल्ला प्रहरी कार्यालय, बारामा तानिएर अर्को प्रहरी निरीक्षक राजाबाबु ठाकुरलाई इलाका प्रहरी कार्यालय, प्रसौनीको प्रमुखका रूपमा पठाइएको बारा प्रहरीले जनाएको छ ।

अस्पताल भवन निर्माण गरेर उद्घाटन गर्न खोजिएको भन्दै ३÷४ दिन पहिलादेखि नै स्थानीयहरूले त्यसको विरोध सुरु गरेका थिए ।

स्थानीयहरूबाट विरोध भैरहेको थाहा पाएर बाराका प्रमुख जिल्ला अधिकारी खडानन्द अधिकारी र प्रहरी प्रमुख नरेन्द्र कुँवरले फेटा गाउँपालिका प्रमुख रुस्तमलाई बोलाएर विवादित कार्य नगर्न भन्दाभन्दै यो घटना घटाउन लगाएको स्थानीयहरूले आरोप लगाएका छन् ।

प्रहरीको गोली लागेर पासवान घाइते भएको घटनापछि बाराका प्रमुख जिल्ला अधिकारी खडानन्द अधिकारीले फेटाका राजनीतिक दल र पीडित पक्षसँग छलफल गरेर घटनाको दोषीलाई कारबाही गर्ने आश्वासन दिएपछि स्थिति सामान्य बन्दै गएको छ ।

बाराका प्रमुख जिल्ला अधिकारीले सुरुमै गाउँपालिका प्रमुख अंसारी र विपक्षी खेमाका अमिरीलाई साहलाई अस्पताल उदघाटनको विषयलाई लिएर गाउँमा झडप नगराउन भन्दाभन्दै यो घटना गराइएको आरोप लगाएका छन् ।