हेटौँडा । बागमती प्रदेशका मुख्यमन्त्री इन्द्रबहादुर बानियाँले उच्च राजनीतिक नैतिकता देखाउँदै मुख्यमन्त्री पदबाट राजीनामा दिएका छन् ।

सोमबार प्रदेश सभा बैठकमा सम्बोधन गर्दै बानियाँले मुख्यमन्त्री पदबाट राजीनामा दिएर नयाँ सरकार बनाउन मार्गप्रशस्त गरेको घोषणा गरेका हुन् ।

प्रदेश सभा बैठकको रोस्ट्रमबाट राजीनामा घोषणा गरेका बानियाँले लगत्तै प्रदेश प्रमुखलाई भेटेर राजीनामा पत्र बुझाएका छन् ।

मुख्यमन्त्री बानियाँले प्रदेश सभामा विश्वास मत लिने भने पनि बहुमत जुट्ने सम्भावना नदेखेपछि राजीनामा दिएका छन् । बानियाँ कांग्रेस संसदीय दल नेता हुन् ।

कांग्रेस नेतृत्वको बागमती प्रदेश सरकारमा सामेल भएको एमालेले साउन ६ गते समर्थन फिर्ता लिएको थियो । मुख्यमन्त्री बानियाँले बहुमत जुटाउने कोसिस पनि गरेका थिए ।

बानियाँले एमाले र नेकपालाई बहुमत जुटाएर सरकार बनाउन आग्रह गरेका छन् । बागमती प्रदेश सभामा एमाले र नेकपालाई नयाँ सरकार बनाउन २ जना सांसद चाहिन्छ ।

१२ जना सांसद रहेको राप्रपा भने तटस्थ बस्ने निर्णय गरिसकेको छ । सरकार बनाउन बहुमत पुर्‍याउन ५३ जना सांसदको साथ चाहिन्छ ।

यसैबीच, बानियाँलाई बागमतीका प्रदेश प्रमुखले अर्को मन्त्रिपरिषद गठन नभएसम्मका लागि कार्य सञ्चालनको जिम्मेवारी दिएका छन् ।