गाइघाट । उदयपुरमा स्कुल बस दुर्घटना हुँदा १ जनाको मृत्यु भएको छभने ३० जना घाइते भएका छन् ।

शनिबार उदयपुरगढी गाउँपालिका वडा नं. ७ जोगीटोलमा स्कुल बस दुर्घटना हुँदा १ जनाको मृत्यु भएको प्रहरीले विज्ञप्तिमार्फत जनाएको छ । दुर्घटनामा ३० जना घाइते भएका छन् ।

महोत्तरीबाट सुनसरीतर्फ जाँदै गरेको बा २ ख ६४३८ नम्बरको दीप एजुकेशन बोर्डिङ स्कुलको स्टाफ बोकेको बस अनियन्त्रित भई सडकबाट करीव १२ मिटर तल खसेर दुर्घटनाग्रस्त भएको छ ।

दुर्घटनामा गम्भीर घाइते भएका महोत्तरीको बर्दिबास नगरपालिका बस्ने ५५ वर्षीय विमलेश दत्तको उपचारका क्रममा मृत्यु भएको प्रहरीले विज्ञप्तिमार्फत जनाएको छ ।

दुर्घटनामा ३० जना घाइते भएका छन् । घाइतेमध्ये २ जनाको अवस्था गम्भीर, ५ जनाको मध्यम र २३ जनाको अवस्था सामान्य रहेको छ । गम्भीर घाइते रसिलाकुमारी चौधरी र सन्देशकुमार चौधरीलाई थप उपचारका लागि न्यूरो अस्पताल, विराटनगर रिफर गरिएको छ ।

बस चालक महोत्तरीको गौशाला नगरपालिका वडा नं. १० निवासी २८ वर्षीय जीवन आले सकुशल रहेका छन् । दुर्घटना सम्बन्धमा थप अनुसन्धान भइरहेको छ ।