काठमाडौं । अख्तियार दुरुपयोग अनुसन्धान आयोगले ईञ्जिनियर मोहनदेव मल्लविरुद्ध विशेष अदालत, काठमाडौंमा भ्रष्टाचारको मुद्दा दर्ता गराएको छ ।

बुधबार अख्तियारले बर्दियाको बारबर्दिया नगरपालिकाका ईञ्जिनियर मल्लविरुद्ध विशेष अदालतमा भ्रष्टाचार मुद्दा दायर गरिएको सहायक प्रवक्ता गणेशबहादुर अधिकारीले बताए । ईञ्जिनियर मल्ल सेवाग्राहीसँग १ लाख ५० हजार रुपियाँ घुस, रिसवत लिने क्रममा रंगेहात पक्राउ परेका थिए ।

बारबर्दिया नगरपालिका वडा नं. ७ को विद्यालयको ४ कोठाको भवन निर्माण कार्यको अन्तिम बिल भुक्तानीका लागि सहजीकरण गरिदिए वापत ईञ्जिनियर मल्लले १ लाख ५० हजार घुस, रिसवत माग गरेका थिए ।

अख्तियारले ईञ्जिनियर मल्ल बिगो १ लाख ५० हजार कायम गरी भ्रष्टाचार निवारण ऐन, २०५९ को दफा ३ को देहाय (ग) बमोजिम कैद र सोही ऐनको दफा ३ को उपदफा (१) बमोजिम जरिवाना सजाय हुने मागदाबी गरिएको विज्ञप्तिमा उल्लेख छ ।