काठमाडौं । अख्तियार दुरुपयोग अनुसन्धान आयोगले सरकारी जग्गा व्यक्तिको नाममा दर्ता गरेको आरोपमा मालपोत कार्यालय, सोलुखुम्बुका तत्कालीन कार्यालय प्रमुख स्वर्गीय केशवबहादुर कार्कीसहित ४ जनाविरुद्ध भ्रष्टाचार मुद्दा दायर गरेको छ ।

शुक्रबार अख्तियारले कार्कीसहित ४ जनाविरुद्ध विशेष अदालत, काठमाडौंमा गैरकानूनी लाभ वा हानी पु¥याई भ्रष्टाचार गरेको आरोपमा मुद्दा दायर गरेको प्रेस विज्ञप्तिमा उल्लेख छ ।

सोलुखुम्बुको साबिक चौँरीखर्क गाउँ विकास समितिको वडा नम्बर ८ स्थित सरकारी जग्गा व्यक्ति विशेषको नाउँमा दर्ता गरेको दाबी अख्तियारको छ ।

मालपोत कार्यालयका तत्कालीन प्रमुख कार्कीको मृत्यु भइसकेको हुनाले उनको श्रीमती कमला कार्कीलाई प्रतिवादी कायम गरिएको छ ।

आयोगले मालपोत कार्यालयका तत्कालीन खरिदार तेजनाथ पौडेल, स्थानीय मनमाया नेपाली र सुबोध नेपालीलाई प्रतिवादी कायम गरेको प्रवक्ता सुरेश न्यौपानेद्वारा जारी विज्ञप्तिमा उल्लेख छ । उनीहरूविरुद्ध १९ लाख ९० हजार ५७५ रुपियाँ बिगो कायम गरिएको छ ।