काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई काठमाडौं जिल्ला अदालतले पाँच दिन थुनामा राखेर अनुसन्धान गर्न प्रहरीलाई अनुमति दिएको छ ।

आइतबार अदालतले ओली र लेखकलाई पाँच/पाँच दिन थुनामा राखेर अनुसन्धान गर्न प्रहरीलाई अनुमति दिएको हो ।

भक्तपुरबाट शनिबार प्रहरीले ओली र लेखकलाई पक्राउ गरेको थियो । उनीहरूलाई म्याद थपका लागि प्रहरीले अदालत लगेको थियो । प्रहरीले १० दिन थुनामा राख्न मागसहित इजलास समक्ष निवेदन पेश गरेको थियो ।

भदौ २३ र २४ गतेको घटनामा जाँचबुझ आयोगले कारबाही सिफारिससहित बुझाएको प्रतिवेदनका आधारमा उनीहरू शनिबार पक्राउ परेका थिए ।

दुवै जनालाई १० दिन थुना म्यादको मागसहित सरकारी वकिलले इजलास समक्ष निवेदन पेश गरेका थिए ।

पक्राउ परेका ओलीले स्वास्थ्यका कारण शिक्षण अस्पताल महाराजगञ्ज भर्ना भएका छन् । ओलीको भर्चुअल रूपमा इजलासमा उपस्थिति जनाइएको थियो । लेखक भने सुनुवाईका क्रममा इजलासमै उपस्थित भएका थिए ।

दुईतर्फी सुनुवाई सकिएपछि ओलीको थुना मनासिब रहेको आदेशमा लेखिएको छ । प्रतिवादीहरूलाई हिरासतमा राखेर जाँचबुझ आयोगको प्रतिवेदन अध्ययन विश्लेषणको अनुमति माग भएकाले लेखक र ओलीलाई हिरासतमा राख्ने माग मनासिब रहेको आदेशमा उल्लेख छ ।

‘प्रतिवादीहरू केपी शर्मा ओली र रमेश लेखकलाई प्रहरी हिरासतमा राखी उपरोक्त लेखिए बमोजिमको कार्यहरू सम्पन्न गर्ने प्रयोजनका लागि ५ दिन म्याद थपको अनुमति प्रदान गरिदिएको छ’ आदेशमा भनिएको छ ।