काठमाडौं । विशेष अदालत, काठमाडौंले पोखरा क्षेत्रीय अन्तर्राष्ट्रिय विमानस्थलको भ्रष्टाचार मुद्दामा एमालेका नेता समेत रहेका पूर्व संस्कृति, पर्यटन तथा नागरिक उड्डयनमन्त्री भीम आचार्यसँग धरौटी रकम माग गरेको छ ।

सोमबार विशेष अदालतका न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलाले धरौटी रकम माग गरेको हो । आचार्यसँग २ लाख ५० हजार धरौटी माग गरेको अदालतले जनाएको छ ।

आचार्य पर्यटनमन्त्री हुँदा विमानस्थलको लागत अस्वभाविक बढाएर अनियमितता भएको अख्तियारको दाबी छ । अख्तियारले उनीलगायत विरुद्ध गत मंसिर २१ गते विशेष अदालतमा मुद्दा दायर गरेको थियो ।

अख्तियार दुरुपयोग अनुसन्धान आयोगले पोखरा विमानस्थलमा भएको भनिएको करोडौंको भ्रष्टाचारमा पूर्वमन्त्री, नेपाल नागरिक उड्डयन प्राधिकरणका तत्कालीन महानिर्देशक प्रदीप अधिकारी लगायतविरुद्ध मुद्दा दायर गरेको छ ।

आचार्य पर्यटनमन्त्री हुँदा विमानस्थलको लागत अस्वाभाविक रुपमा बढाएर अनियमितता गरेको दाबीसहित अख्तियार दुरुपयोग अनुसन्धान आयोगले गत मंसिर २१ मा मुद्दा दर्ता गरेको थियो । पोखरा विमानस्थलको भ्रष्टाचारकाण्ड मुद्दामा ५५ जनालाई विपक्षी बनाइएको छ । उनीहरूबाट आठ अर्ब ३६ करोड रुपियाँ बराबरको बिगो कायम गरी असुल उपर गर्न माग दाबी गरिएको छ ।