नयाँ दिल्ली । भारतका केन्द्रीय इलेक्ट्रोनिक्स तथा सूचना प्रविधिमन्त्री अश्विनी वैष्णवले सन् २०२६ देखि भारतमा सेमिकन्डक्टर चिपको व्यावसायिक उत्पादन शुरू हुने बताएका छन् ।

एएनआईसँग कुरा गर्दै उनले यो प्रगति सन् २०२२ को जनवरीमा शुरू गरिएको इन्डिया सेमिकन्डक्टर मिसनले तय गरेको समयसीमा अनुरुप नै भइरहेको बताएका छन् ।

मन्त्री वैष्णवले मिसन शुरू गर्दा सरकारले पाँच वर्षभित्र व्यावसायिक उत्पादन थाल्ने लक्ष्य राखेको बताए । मन्त्री वैष्णवले भने, ‘पहिलो व्यावसायिक उत्पादन सन् २०२६ मा शुरू हुनेछ । यस वर्ष चारवटा प्लान्ट सञ्चालनमा आउने अपेक्षा गरिएको छ । सन् २०२५ मा तीनवटा प्लान्टमा परीक्षण उत्पादन शुरू भइसकेको छ ।’

भारतको सेमिकन्डक्टर इकोसिस्टम तीव्र गतिमा आकार लिइरहेको छ । विश्वका प्रमुख उपकरण निर्माताहरूले भारतमा आफ्नो सञ्चालन स्थापना गरिरहेका छन् । सामग्री उत्पादनको इकोसिस्टम पनि बलियो बन्दै गएको छ ।

सेमिकन्डक्टर मिसनको पहिलो चरणका धेरै लक्ष्यहरू समयभन्दा अगाडि नै पूरा भइरहेको मन्त्री वैष्णवले बताए । १० वर्षमा ८५,००० दक्ष पेशेवर तयार गर्ने लक्ष्य राखिएकोमा, भारतले चार वर्षमै ६५,००० जनालाई तालिम दिइसकेको छ ।

लगानीको विषयमा बोल्दै मन्त्री वैष्णवले हालसम्म कुल लगानी करिब ९० अर्ब अमेरिकी डलर पुगेको बताए । आगामी फेब्रुअरी १६–२० मा नयाँ दिल्लीमा हुने एआई इम्प्याक्ट समिटसम्ममा प्रतिबद्ध लगानी बढेर १५० अर्ब डलर पुग्ने अपेक्षा गरिएको छ ।