काठमाडौं । नेपाली कांग्रेस बागमती प्रदेश, संसदीय दल र बागमती कांग्रेस कार्यसमितिको संयुक्त बैठक भक्तपुरमा बस्न लागेको छ ।

शुक्रबार र शनिबार दुई दिन संयुक्त बैठक बस्नेछ । कात्तिक २८ गते १२ बजेबाट संयुक्त बैठक शुरु हुने संसदीय दलका सदस्य सचिव मीनकृष्ण महर्जनले बताएका छन् । बैठक शनिबार दिउँसो १ बजे सम्पन्न हुनेछ ।

बागमती प्रदेशका पूर्वमन्त्री समेत रहेका सदस्य सचिव महर्जनका अनुसार संयुक्त बैठकमा समसामयिक राजनीतिक अवस्था, प्रतिनिधि सभाको आगामी निर्वाचन लगायतका विषयमा छलफल हुनेछ ।

भक्तपुरको नगरकोटमा रहेको होटल चौतारीमा बैठक बस्नु अगाडि शुक्रबार बिहान ११ बजे शंखधर चोक, ठिमी भक्तपुरमा भेला भइ सामूहिक रुपमा नगरकोट प्रस्थान गर्ने कार्यक्रम रहेको सदस्य सचिव महर्जनले बताए ।

संयुक्त बैठकका लागि बागमती कांग्रेसका मुख्यमन्त्री समेत रहेका संसदीय दलका नेता एवम् सभापति ईन्द्रबहादुर बानियाँ लगायतका नेता र सांसदहरू नगरकोट पुगेका छन् ।