इटहरी । नेपाल तरुण दल इनरुवा नगर कार्यसमिति, सुनसरीमा विभिन्न राजनीतिक दल परित्याग गरेका युवाहरू प्रवेश गरेका छन् ।

शनिबार इनरुवामा तरुण दलले आयोजना गरेको कार्यक्रममा एक सयभन्दा धेरै युवाहरू तरुण दलमा प्रवेश गरेका हुन् ।

तरुण दल इनरुवाका सभापति अरविन केसीको सभापतित्वमा आयोजित कार्यक्रममा कांग्रेसका केन्द्रीय सदस्य राजीव कोइरालाले नवप्रवेशी युवाहरूलाई तरुण दलमा स्वागत गरेका हुन् । कोइरालाले नवप्रवेशीहरूलाई तरुण दलको संगठन निर्माणमा लाग्न आग्रह गरेका छन् ।

तरुण दल सुनसरी क्षेत्र नं. ४ का क्षेत्रीय सचिव सत्यनारायण यादवले इनरुवा–२ निवासी विवेक खतिवडालाई नगर उपसभापति पदमा मनोनीत पनि गरेको छन् ।

जिल्ला समन्वय समिति सुनसरीका संयोजक राजन मेहता, नेपाली कांग्रेस सुनसरी जिल्ला सभापति तथा इनरुवा नगरपालिकाका मेयर केदार भण्डारी, सुनसरी क्षेत्र नं. ४ का क्षेत्रीय सभापति तथा कोशी गाउँपालिकाका अध्यक्ष ऐयुब अन्सारी लगायत नेताहरूको उपस्थिति रहेको थियो ।