हेटौँड । जिल्ला प्रहरी कार्यालय मकवानपुरले ८० किलो १२० ग्राम गाँजासहित २ जना मानिसलाई पक्राउ गरेको जनाएको छ ।

आइतबार बिहान १ बजेर ३० मिनटको समयमा थाहा नगरपालिका वडा नं.०३ थानाबजारस्थित त्रिभुवन राजपथ सडकखण्डबाट गाँजा बोकेको गाडीसहित दुई जनालाई पक्राउ गरिएको मकवानपुर प्रहरीका प्रमुख (एसपी) विश्वराज खड्काले बताए ।

लागुऔषध ओसार पसार भइरहेको भन्ने विषेश सूचनाको आधारमा इलाका प्रहरी कार्यालय पालुङबाट खटिएको प्रहरी टोलीले गाँजा बरामद गरेको थियो ।

डाडाँबासबाट काठमाडौंतर्फ जाँदै गरेको बा.५ च ४४११ नम्बरको टाटा सुमो गाडीमा गाँजा बरामद भएको थियो । टाटा सुमोका चालक गोरखाको पालुङटार नगरपालिका काठमाडौं महानगरपालिका वडा नं.१३ कालीमाटी डेरा गरी बस्ने वर्ष २८ को मधुसुदन अधिकारी र सोही सुमोमा सवार रही आएका सिन्धुलीको दुधौली नगरपालिका वडा नं.०८ खोरभञ्ज्याङ स्थायी घर भई हाल काठमाडौंको डल्लुमा डेरा गरी बस्ने वर्ष २५ को नवराज खड्कालाई पक्राउ गरिएको एसपी खड्काले बताए ।

मधुसुदन अधिकारी र नवराज खड्कालाई मकवानपुर जिल्ला अदालत हेटौँडाबाट लागुऔषध कसूर मुद्धामा १० दिनको म्याद अनुमति लिइएको छ ।