काठमाडौं । सर्वोच्च अदालतमा पहिलाकै न्यायाधीशको इजलासमा राष्ट्रिय स्वतन्त्र पार्टी (रास्वपा)का सभापति रवि लामिछानेको बन्दी प्रत्यक्षीकरण निवेदन इजलासमा परेपछि हेर्न नमिल्ने भएको छ ।

लामिछानेको बन्दी प्रत्यक्षीकरण निवेदन आइतबार पनि न्यायाधीश मनोजकुमार शर्मा र सुनीलकुमार पोखरेलको इजलासमा परेपछि हेर्न नमिल्ने भएको हो । लामिछानेको निवेदन न्यायाधीश पोखरेलले हेर्न नमिल्ने भन्दै सुनुवाइ नभएको हो ।

यसअघि वैशाख २८ गते पनि न्यायाधीश पोखरेलको इजलासमा पेसी परेपछि हेर्न नमिल्ने भनेर सुनुवाइ भएको थिएन ।

निवेदन हेर्न नमिल्ने न्यायाधीशको इजलासमा पेसी परेको पाँचौँ पटक भएको छ । हरि फुयालले पनि लामिछानेको निवेदनमा सुनुवाइ गरेनन् ।

वैशाख ९ गते कारण देखाऊ आदेश जारी गरेका न्यायाधीश अब्दुल अजिज मुसलमानले पनि त्यसपछि हेर्न नमिल्ने भन्दै सुनुवाइ गरेका छैनन् ।

लामिछानेसँगै पूर्वडीआईजी छविलाल जोशीको निवेदन पनि साथै राखेर पेस गरिएको छ । उनीहरू दुवै जना रुपन्देही कारागारमा छन् ।