हेटौँडा । नेपाली रुपियाँ ५०० दरको नक्कली नोट १८६ थानसहित १ जनालाई पक्राउ गरेको जिल्ला प्रहरी कार्यालय, मकवानपुरले जनाएको छ ।

बिहीबार बिहान सवा १ बजेको समयमा प्रहरी चौकी रातोमाटे मकवानपुरबाट खटिएको प्रहरी टोलीले हेटौँडा उपमहानगरपालिका वडा नं. १५ रातोमाटेस्थित पूर्व पश्चिम लोकमार्ग सडकखण्डमा बर्दिबासबाट हेटौडातर्फ आउदैं गरेको बा. ३३ प ९९८३ नम्बरको मोटरसाईकल चालकलाई पक्राउ गरेको मकवानपुर प्रहरीका प्रमुख (एसपी) विश्वराज खड्काले बताए ।

धादिङको गंगाजमुना गाउँपालिका वडा नं. २ घर भई हाल हेटौँडा उपमहानगरपालिका वडा नं. ०८ बस्ने वर्ष ४२ को रामकृष्ण अधिकारीलाई पक्राउ गरेको एसपी खड्काले बताए ।

नेपाली रुपियाँ ५०० दरले नक्कली नोट १८६ थान जम्मा ९३ हजार फेला परेको एसपी खड्काले बताए ।

नक्कली नोट बरामद गरी रामकृष्ण अधिकारीलाई मुद्रा सम्बन्धी कसूर मुद्दामा मकवानपुर जिल्ला अदालत हेटौँडाबाट ७ दिनको म्याद अनुमति लिई थप अनुसन्धान कार्य भइरहेको छ ।