हेटौँडा । जिल्ला प्रहरी कार्यालय मकवानपुरले ठूलो परिमाणमा लागुऔषधसहित मानिसहरू पक्राउ गरेको छ ।

बिहीबार हेडौँडास्थित जिल्ला प्रहरी कार्यालयमा पत्रकार सम्मेलन गरेर प्रहरी प्रमुख (एसपी) विश्वराज खड्काले ७५ सय क्याप्सुल लागुऔषध ट्रामाडोल बोकेको गाडीसहित २ जनालाई पक्राउ गरेको बताए ।

हेटौँडा उप–महानगरपालिका वडा नं. १५ रातोमाटे चेकपोइन्टमा सवारी साधनहरू रोकी चेकजाँच गर्ने क्रममा करिब ४ लाख रुपियाँ बराबरको लागुऔषध ट्रामाडोल बरामद भएको एसपी खड्काले बताए ।

बाराको सिम्ररौनगढबाट हेटौँडातर्फ आउँदै गरेको मधेश प्रदेश ०२–००१ च १४३८ नम्बरको योद्धा पिकअप गाडी र चालक बारा पचरौता नगरपालिका वडा– ७ बेनौली बस्ने २५ वर्षीय तिर्थलाल पासवान र सह–चालक सोही ठाउँका २३ वर्षीय सुनिल पटेललाई पक्राउ गरिएको खड्काले बताए ।

गाडीको अगाडिको इन्जिन भएको भागमा लुकाई छिपाई राखी ल्याएको अवस्थामा लागुऔषध फेला परेको एसपी खड्काले बताएका छन् ।