तातोपानी । परराष्ट्रमन्त्री डा.आरजु राणाले तातोपानी स्नान गृह भवनको उद्घाटन गरेका छन् ।

शुक्रबार सिन्धुपाल्चोकको भोटेकोशी गाउँपालिका वडा नं. २ मा डा.राणाले तातोपानी स्नान गृह भवनको उद्घाटन गरेकी हुन् । भवन उद्घाटन कार्यक्रममा नेपाली कांग्रेसका नेता एवम् पूर्वमन्त्री मोहनबहादुर बस्नेतसहितका नेताहरूको उपस्थिति रहेको थियो ।

भोटेकोशी गाउँपालिकाद्वारा नवनिर्मित पवित्र धार्मिक धरोहर तातोपानी धाराको स्नान गृहभवन निर्माण गरिएको छ । सो स्थानमा थोरै रकम तिरेर कोठाभित्र स्नान गर्ने व्यवस्था रहेको छ । नेपाल–चीन सिमाना नजिकै रहेको कोदारी नाकासँग जोडिएको तातोपानीको धार्मिक महत्व छ ।

उद्घाटनका क्रममा भोटेकोशी गाउँपालिकाका अध्यक्ष पासाङ नुर्पु शेर्पा, उपाध्यक्ष दिछेन शेर्पा, वडा नं. २ का वडाध्यक्ष कुमार श्रेष्ठलगायतको उपस्थिति रहेको थियो ।

परराष्ट्रमन्त्री डा.राणालाई फुटबल मैदानदेखि तातोपानी स्नान गृहसम्म नेपाली कांग्रेसका नेता कार्यकर्ताले बाजागाजा, गाडी, मोटरसाइकलबाट लावालस्करसहित लगेका थिए ।