देवघाट । नेपाली कांग्रेसका केन्द्रीय सदस्य एवं सांसद शंकर भण्डारीले कालीगण्डकी डाइभर्सन कुनै पनि हालतमा स्वीकार्य नहुने बताएका छन् ।

मंगलबार तनहुँ, चितवन र नवलपुर त्रिवेणीस्थल देवघाटमा आयोजित कार्यक्रममा पूर्वमन्त्री समेत रहेका सांसद भण्डारीले कालीगण्डकीको महत्व समाप्त पार्ने गरी बनाउन लागिएको डाइभर्सन मान्य नहुने बताए ।

उनले देवघाट र कालीगण्डकी नदीको विशेष धार्मिक महत्व रहेको हुँदा त्यसलाई जोगाएर राख्नुपर्ने बताएका छन् । कालीगण्डकीलाई डाइभर्सन गरेको खण्डमा देवघाटको अस्तित्व समेत संकटमा पर्ने सांसद भण्डारीले बताए ।

उनले कालीगण्डकी डाइभर्सन गर्दा विश्वभरिका हिन्दूको भावनामा समेत जोड पुग्ने र कालीगण्डकीको सभ्यता नै नाश भएर जाने बताए । कालीगण्डकी डाइभर्सन रोक्नका लागि आफ्नो तर्फबाट भूमिका निर्वाह गरिरहेको भण्डारीले बताए ।

कालीगण्डको हिन्दुको सभ्यता बचाउन सबै नागरिकले साथ दिने पूर्वमन्त्री भण्डारीले बताएका छन् । उनले कालीगण्डीको धार्मिक महत्व अन्त्य गर्ने कार्यविरुद्ध आफूले निरन्तर आवाज उठाउने बताए ।