काठमाडौं । नेपाली कांग्रेसका नेता समेत रहेका राज्य व्यवस्था तथा सुशासन समितिका सभापति रामहरि खतिवडाले लिखु गाउँपालिकाका सेवाग्रहीहरूलाई ईलाका प्रशासन कार्यालय खिजीबाट सेवा लिन सकिने व्यवस्था गरिदिएका छन् ।

गृह मन्त्रालयको मन्त्रिस्तरीय निर्णयबाट शुक्रबारदेखि लागू हुनेगरी ओखलढुङ्गाको लिखु गाउँपालिकाका वडा नं. ६, ७, ८ र ९ का नागरिकले ईलाका प्रशासन कार्यालय खिजीबाट सेवा लिन सक्नेछन् ।

लिखुका ४ वटा वडाका नागरिकले नागरिकता, पासपोर्ट, परिचय–पत्र लगायतका सरकारी सेवा ईलाका प्रशासन कार्यालय खिजीबाट लिन सकिने गरि गृह मन्त्रालयले निर्णय गरेको सभापति खतिवडाले बताएका छन् ।

भौगोलिक विकटताका कारण लिखु गाउँपालिकाको ६, ७, ८ र ९ नम्बरका वडाका नागरिकले सदरमुकामसम्म पुगेर सेवा लिनु पर्ने बाध्यता थियो ।

यो बाध्यतालाई हटाउन सभापति खतिवडाले गृह मन्त्रालयमा पहल गरेका थिए । नागरिकता, राहदानी, राष्ट्रिय परिचयपत्र लगायतका सेवा लिन सदरमुकामसम्म पुग्नुपर्ने बाध्यता हटेको छ । ती चार वटा वडाका नागरिककाे समय र आर्थिक भार बचत भएकाे छ ।