काठमाडौं । नेपाली कांग्रेसका सांसद शंकर भण्डारीले तनहुँको खुला चिडियाखाना आयोजनालाई पूर्णता दिन माग गरेका छन् ।

सोमबार बसेको प्रतिनिधि सभाको बैठकमा सांसद भण्डारीले पर्यटकीय नगर पोखरासँग जोडिएको तनहुँको खुला चिडियाखानाको आयोजनालाई कार्यान्वयन गर्न आग्रह गरे । उनले आयोजनामा मुआब्जा पाउन बाँकी जनतालाई छिटो मुआब्जा दिन माग गरेका छन् ।

उनले भने, ‘तनहुँको भानु नगरपालिका र व्यास नगरपालिकाअन्तर्गत २०७४ सालमै मन्त्रिपरिषदले खुला चिडियाखाना निर्माण गर्ने निर्णय गरेको थियो ।’

‘त्यस सन्दर्भमा १४२ घरको निजी जमीनहरू रोक्का गरिएको र मुआब्जा नपाएको तथा जनता धेरै ठूलो मर्कामा परेका छन्’, पूर्वमन्त्री समेत रहेका सांसद भण्डारीले भने ।

‘पोखरासँग जोडिएको भूगोल पनि हो । जनताको मौलिक हकसँग जोडिएको विषय पनि हो’, भण्डारीले भने, ‘राष्ट्रिय गौरवको महत्वपूर्ण आयोजनालाई अलपत्र पार्नु दुखद् कुरा हो ।’