लम्कीचुहा । नेपाली कांग्रेसकी नेतृ समेत रहेकी परराष्ट्रमन्त्री डा.आरजु राणाले कैलालीमा नवनिर्मित वीपी स्मृति भवनको उद्घाटन गरेकी छिन् ।

सोमबार लम्कीचुहा नगरपालिकामा मन्त्री डा.राणाले कांग्रेसका संस्थापक एवं नेपालका प्रथम जननिर्वाचित प्रधानमन्त्री वीपी कोइराला र नेपाली महिला आन्दोलनकी प्रमुख अगुवा मंगलादेवी सिंहको सालिक उद्घाटन गरेकी हुन् । नवनिर्मित वीपी स्मृति भवनमा नेपाली कांग्रेस कैलाली क्षेत्र नं. २ को पार्टी कार्यालय रहनेछ ।

उनले वीपी कोइराला र मंगलादेवी सिंह जस्ता प्रजातान्त्रिक व्यक्तित्वहरूको सालिक अनावरण गर्न पाउँदा आफूलाई खुसी लागेको बताएकी छिन् ।

‘नवनिर्मित वीपी स्मृति भवनको उदघाटन गर्न पाउँदा खुसी लागेको छ’, डा.राणाले भनिन्, ‘यस्तो महत्वपूर्ण कार्यक्रममा मलाई प्रमुख अतिथिको रुपमा उपस्थित हुने अवसर प्रदान गर्नुभएकोमा आयोजकहरूप्रति हार्दिक धन्यवाद ज्ञापन गर्दछु ।’