चुनाव चिह्न रुख र आधिकारिकता देउवाले पाउनु हुन्छ : नेता साउद

महेन्द्रनगर । नेपाली कांग्रेसका नेता एनपी साउदले पार्टीको चुनाव चिह्न रुख र आधिकारिकता शेरबहादुर देउवाले पाउने बताएका छन् ।

बुधबार नेपाली कांग्रेस कञ्चनपुरको जिल्ला अधिवेशनलाई सम्बोधन गर्दै नेता साउदले सर्वोच्च अदालतबाट न्यायिक पुनरावलोकनको निस्सा प्राप्त भएकाले देउवा पक्षले आधिकारिकता पाउने दाबी गरेका हुन् ।

नेता साउदले भने, ‘ढुक्क भएर म साथीहरूलाई भन्न चाहन्छु– हामीहरू रुख पाउँछौं । आधिकारिकता पाउँछौं ।’

नेता साउदले अदालतले अहिलेसम्म पार्टीको आधिकारिकता वा चुनाव चिह्न रुख कुनै एक पक्षलाई नदिएको उल्लेख गर्दै दुवै पक्षको दाबी अदालतमा कायमै रहेको बताए ।

‘अदालतले न्यायिक पुनरावलोकन दिएको छ । अहिले रुख या पार्टी कुनै एक पक्षलाई दिएको छैन । हामी दुई पक्ष छौं । एक पक्ष उनीहरू, एक पक्ष हामीहरू,’ उनले भने, ‘जबसम्म अदालतले एक पक्षलाई दिन्न, तबसम्म दुई वटै पक्षको अदालतमा क्लेम कन्टिन्यू रहन्छ । हाम्रो अदालतमा क्लेम छ ।’

सर्वोच्च अदालतले न्यायिक पुनरावलोकनको अनुमति दिनु आफ्नो पक्षका लागि महत्वपूर्ण भएको उनको भनाइ थियो ।

प्रधानन्यायाधीशसहितको इजलासले यसअघि गरेको फैसलामा उल्लेखित विषय, विगतका नजिर तथा प्राकृतिक न्यायको सिद्धान्तसमेत आकर्षित भएकाले पुनरावलोकनको निस्सा दिइएको नेता साउदले बताए ।

‘प्रधानन्यायाधीशसहितको बेञ्चले फैसला गरिसकेपछि त्यहाँ उल्लेख भएबमोजिम विगतका नजिरहरू र प्राकृतिक न्यायको सिद्धान्तको विषयवस्तु पनि आकर्षित भएको हुनाले तपाईंहरूलाई पुनरावलोकनको निस्सा दिइएको छ भनेर अदालतले निर्णय गरिसकेको छ,’ साउदले भने ।

उनले सर्वोच्च अदालतबाट पुनरावलोकनको अनुमति पाउने अवस्था सीमित हुने उल्लेख गर्दै अदालतको पछिल्लो निर्णयले आफ्नो पक्षको दाबीलाई बल पु¥याएको बताएका छन् ।

Published : Wednesday, 2026 November 18, 10:23 pm

फेसबुकबाट तपाईको प्रतिक्रिया