बिराटगर । नेपाली कांग्रेस मोरङ क्षेत्र नम्बर ६ को अधिवेशनका दलबलसहित पुगेकी तथाकथित विशेष महाधिवेशनबाट सहमहामन्त्री बनेकी डिला संग्रौलाको समूहले कुटाइ खाएको छ ।

बुधबार मनोनयन दर्ता गर्ने कार्यक्रम रहेका बेला संग्रौलाको समूहले चुरीफुरी देखाएर अधिवेशनलाई कब्जा गर्न खोजेपछि कांग्रेसका स्थानीय नेता तथा कार्यकर्ताहरूले कुटपिट गरेर लखेटेको प्रत्यक्षदर्शीले बताएका छन् ।

सुन्दरहरैँचा–४ को सिग्देल बन्धु प्रतिष्ठानको भवनमा बुधबार अधिवेशन उद्घाटन गर्ने कार्यक्रम रहेको थियो ।

पूर्व प्रदेश सांसदसमेत रहेका नेता चुमनारायण तवदार, समुन्द्र पोखरेल र चेतराज रेग्मीमाथि सांघातिक हमला भएको कुटाइ खाने पक्षले जनाएको छ ।

डिला संग्रौलाले सभापति देवराज तामाङका कार्यकर्ताले फलामको रडले आक्रमण गरेको आरोप लगाएकी छिन् ।

घाइतेहरूको उपचार नोबेल मेडिकल हस्पिटलमा भइरहेको छ । क्षेत्रीय सभापति देबु तामाङको योजनामा आक्रमण भएको आरोप नेतृ संग्रौलाले लगाएकी छिन् ।

संग्रौलाले दोषीलाई पार्टीबाट निलम्बन गर्न पनि माग गरेकी छिन् । आफूले भागेर ज्यान जोगाएको संग्रौलाले बताएकी छिन् ।

सभापति तामाङले भने नेतृ संग्रौलाकै कारण झडप भएको बताएका छन् । सभापति तामाङले नेतृ संग्रौलाको आरोप अस्वीकार गर्दै पहिला उनीहरूबाट आक्रमण भएको बताएका छन् ।

दलबलसहित अधिवेशन स्थल प्रवेश गरेर नेतृ संग्रौलाले चुरीफुरी देखाउने खोजेपछि स्थानीय नेता तथा कार्यकर्ताहरूले प्रतिवाद गरेको प्रत्यक्षदर्शी कार्यकर्ताहरूले बताएका छन् ।