काठमाडौं । नेपाली कांग्रेसका नेता डा.शेखर कोइरालाले वाम राजनीतिक विश्लेषक भरत दाहालको पक्राउको बिरोध गरेका छन् ।

सोमबार नेता डा.कोइरालाले सामाजिक सञ्जालमार्फत् दाहालको पक्राउको बिरोध गर्दै बिनासर्त तत्काल रिहाइको माग गरेका हुन् । उनले संविधानले दिएको अभिव्यक्ति स्वतन्त्राको सम्मान गर्न सरकारसँग आग्रह गरेका छन् ।

‘जब सरकार नीति र नियमभन्दा बाहिरबाट चल्न थाल्छ, तब त्यो स्वेच्छ्याचारी हुन थाल्दछ,’ डा.कोइरालाले भने, ‘भरत दाहालको पक्राउ त्यसको पछिल्लो उदाहरण हो । हामी कस्तो समाज निर्माण गर्दैछौं ।’

नेता डा.कोइरालाले भने, ‘भरत दाहालको तुरुन्त रिहाई गर्न र यस्ता लोकतन्त्र विरोधी कृयाकलाप फेरि नदोहोरिने प्रतिवद्धताको लागि सरकारसँग आग्रह गर्दछु ।’

राजनीतिक विश्लेषक दाहालले अमेरिकाको अनलाइनले सार्वजनिक गरेको ‘ग्रे जोन’ रिपोर्टका बिषयमा प्रश्न उठाएका थिए । त्यसपछि झण्डै दुईतिहाइको राष्ट्रिय स्वतन्त्र पार्टी (रास्वपा)को सरकारले दाहाललाई मोरङबाट पक्राउ गरेर हिरासतमा राखेको छ ।