काठमाडौं । सर्वोच्च अदालतका प्रधानन्यायाधीश डा.मनोज शर्मा नेतृत्वको पूर्ण इजलासले नेपाली कांग्रेसको पुनरावलोकन सम्बन्धी निवेदनलाई अध्ययन गर्ने भएको छ ।

सर्वोच्च अदालतबाट विशेष महाधिवेशनलाई मान्यता दिने निर्णयविरुद्ध तत्कालीन सभापति एवम् पूर्वप्रधानमन्त्री शेरबहादुर देउवाले पुनरावलोकन निवेदन दिएका छन् । बिहीबार सर्वोच्च अदालतका तीन न्यायाधीशले पुनरावलोकनको निवेदनको अध्ययन गर्ने भएका छन् ।

निवेदन अध्ययनका लागि सर्वोच्च अदालतले प्रधानन्यायाधीश डा.शर्मा, न्यायाधीशहरू नित्यानन्द पाण्डेय र श्रीकान्त पौडेलको तीन सदस्यीय पूर्ण इजलास गठन गरेको हो ।

पूर्ण इजलासले सुनुवाई नगरी चेम्बर (न्यायाधीशहरूको कार्यकक्ष)मा बसेर निवेदनको अध्ययन गरी पुनरावलोकनको अनुमति हुने वा नहुने भनी आदेश गर्नेछ ।

सर्वोच्च अदालतले देउवा र खड्काको निवेदनमाथि निस्सा हुने आदेश गरेमा तीन सदस्यीय पूर्ण इजलासले फेरि शुरुदेखि मुद्दाको सुनुवाई गर्नेछ । निस्सा नहुने आदेश गरेमा सर्वोच्च अदालतले यसअघि नै टुंग्याएको निर्णय अन्तिम हुनेछ ।

तत्कालीन सभापति देउवा र तत्कालीन कार्यबाहक सभापति पूर्णबहादुर खड्काले सर्वोच्च अदालतमा पुनरावलोकनको लागि छुट्टाछुट्टै निवेदन दिएका छन् ।