काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी)ले बैकिङ कसूर मुद्दाका ४ जना प्रतिवादीलाई पक्राउ गरेको छ ।

नेपाल राष्ट्र बैकको पत्र जाहेरीले बादी नेपाल सरकार प्रतिवादी शशिधर शर्मा समेत भएको बैकिङ कसूर तथा सजाय ऐन, २०६४ अन्तर्गतको कसूरमा संलग्न ४ जनालाई पक्राउ गरिएको बुधबार सीआईबीका प्रवक्ता एवम् एसएसपी अनुपमशम्शेर जबराद्वारा जारी प्रेस विज्ञप्तिमा उल्लेख छ ।

पक्राउ पर्नेमा बैतडीको पाटन नगरपालिका वडा नं. २ स्थायी ठेगाना भई हाल काठमाडौं महानगरपालिकाको तीनकुने बस्ने वर्ष ४० की रश्मी पन्त, गुल्मीको ग्वादी– ६ स्थायी वतन भई हाल रुपन्देहीको सिद्धार्थनगर नगरपालिका– ८ बस्ने वर्ष ४४ का सन्तोष ज्ञवाली, गुल्मीको अमरअर्वाथोक– ५ स्थायी वतन भई हाल रुपन्देहीको सिद्धार्थनगर नगरपालिका– ७ बस्ने वर्ष ४१ का राजेन्द्र श्रेष्ठ र रूपन्देहीको तिलोत्तमा नगरपालिका– ४ स्थायी वतन भएका वर्ष ४८ का शिशिर पौडेल रहेका छन् ।

पक्राउ परेकी रश्मी पन्त प्रभु बैंकको मुख्य बिजनेस अफिसर हुन् । रश्मी पन्तसहित पक्राउ परेकाहरू प्रभु बैंकको ठूलो रकम घोटाला प्रकरणमा पक्राउ परेका हुन् । रश्मीले कर्जा रकम दुरूपयोग गरेको अभियोग लागेको छ । यसअघि सस्आइबीले शशिधर शर्मालाई पक्राउ गरेको थियो । एशियन भिलेज रिसोर्ट प्रा.लि.का अध्यक्ष रहेका शर्मालाई सीआइबीले असार ३० गते पक्राउ गरेको थियो । शर्माले प्रभु बैंकबाट ४८ करोड रुपियाँ कर्जा लिएका थिए । नेपाल राष्ट्र बैंकको सुपरीवेक्षण विभाग २०८३ असारमा तयार गरेको विशेष स्थलगत निरीक्षण गरेको थियो ।

प्रतिवेदनले रिसोर्ट निर्माण र जग्गा खरिद गर्नका लागि लिइएको कर्जा अन्य ऋणी कम्पनीहरूको बक्यौता तिर्न प्रयोग गरेको देखाएको थियो । बैंकको नाममा जग्गा दृष्टिबन्धक समेत नगरी पछि गर्ने भन्ने कबुलियतनामा कागज गराएर कर्ता लिएको र पारिवारिक सम्बन्ध भएकै कारणले रश्मीले दुरूपयोग गरेको आरोप छ । सोही घटनामा रश्मीलाई प्रहरीले नियन्त्रणमा लिएको हो ।

प्रतिवादीहरूलाई पक्राउ गर्न सीआईबीले उच्च अदालत, पाटन, ललितपुरबाट अनुमति लिएको थियो । साउन १३ गते बुधबार पक्राउ गरि अनुसन्धान भइरहेको छ ।