भक्तपुर । भक्तपुरका नगरकोट क्षेत्रमा सामान्य विवादका क्रममा भएको झगडामा चक्कु प्रहारबाट एक युवकको मृत्यु भएको छ ।

मृत्यु हुनेमा महोत्तरीको मिथिला नगरपालिका वडा नं. ९ स्थायी घर भई हाल नगरकोटमोड बस्दै आएका २८ वर्षीय आकाश रसाइली रहेको प्रहरीले जनाएको छ । घटनामा संलग्न रहेको अभियोगमा प्रहरीले तीन जनालाई पक्राउ गरेको छ ।

रसाइलीमाथि सोमबार राति करीव १० बजे चक्कु प्रहार भएको थियो । घटनामा गम्भीर घाइते भएका रसाइलीलाई उपचारका लागि सिनामंगलस्थित केएमसी अस्पताल लगिएको थियो ।

चक्कु लागेर गम्भीर घाइते भएका रसाइलीको उपचारकै क्रममा मंगलबार बिहान ६ बजेतिर मृत्यु भएको प्रहरीले जनाएको छ ।

घटनामा संलग्न रहेको आरोपमा उदयपुरको त्रियुगा नगरपालिका– १३ घर भई हाल भक्तपुरको सल्लाघारी बस्ने ३१ वर्षीय आयुष कार्की, झापाको दमक नगरपालिका– ३ घर भई हाल सल्लाघारी बस्ने २७ वर्षीय दोर्जे शेर्पा तथा गुल्मीको तम्घास घर भई हाल सल्लाघारी बस्ने ३५ वर्षीय रमेश कुँवरलाई प्रहरीले नियन्त्रणमा लिएको छ ।

प्रहरीले घटनाको कारण र संलग्न व्यक्तिहरूको भूमिकाबारे थप अनुसन्धान भइरहेको जनाएको छ ।