लहान । जिल्ला प्रहरी कार्यालय, सिरहाले गोली प्रहार गरेर दुई भारतीय नागरिकलाई लागुऔषधसहित नियन्त्रणमा लिएको छ ।

आइतबार सिरहा नगरपालिका वडा नं. २१ लकडीगोठमा ब्राउनसुगर सहित दुई भारतीय नागरिकलाई पक्राउ गरेको समाचार कक्ष, नक्सालले जनाएको छ ।

इलाका प्रहरी कार्यालय, महेशपुरपतार र लागुऔषध नियन्त्रण ब्यूरो शाखा कार्यालय, गोलबजार, सिरहाको संयुक्त प्रहरी टोलीले ९२.३ ग्राम ब्राउन सुगरसहित २ जनालाई नियन्त्रणमा लिएको प्रहरीले जनाएको छ ।

नियन्त्रणमा लिने क्रममा प्रहरीमाथि ढुंगामुढा प्रहार गर्दै भारततर्फ भाग्न खोजेपछि एक राउण्ड हवाई फायर र एक राउण्ड गोली प्रहार गरिएको प्रहरी समाचार कक्षले जनाएको छ ।

गोली लागेर भारत, मधुवनी जिल्ला पदमाहा ग्राम पञ्चायत–२ जोगिया टोल निवासी अन्दाजी २८ वर्षीय छोटु भनिने रञ्जितकुमार पासवान घाइते भएका छन् । सोही क्रममा इलाका प्रहरी कार्यालय, महेशपुरपतारमा कार्यरत प्रहरी जवान हृदयनारायण ठाकुर पनि खुट्टामा चोट लागेर घाइते भएका छन् । घाइते दुवै जनाको प्रादेशिक अस्पताल सिरहामा उपचार भइरहेको छ ।

घटनास्थलबाट भारतकै मधुवनी जिल्ला निवासी अन्दाजी १७ वर्षीय रमनकुमार पासवानलाई समेत नियन्त्रणमा लिइएको छ । पक्राउ परेका व्यक्तिहरूमाथि थप अनुसन्धान भइरहेको छ ।