काठमाडौं । सभामुख डोलप्रसाद अर्यालले रुलिङ गर्ने विषयमा सांसदहरूलाई आफूलाई नसिकाउन चेतावनी दिएका छन् ।

बुधबार सिंहदरबारमा बसेको प्रतिनिधि सभाको बैठकमा सम्बोधन गर्दै सभामुख अर्यालले भने, ‘हामीले गर्दै आएको प्राक्टिस यी सबैलाई हेर्दा माननीयहरूले हलबाट सभामुखलाई कुन विषयमा रुलिङ गर्ने, कुन विषयमा रुलिङ नगर्ने, कसलाई रुलिङ गर्ने, कसलाई रुलिङ नगर्ने, यसरी रुलिङ गर्नुस् भनेर सभामुखलाई निर्देशन दिने त्यो प्राक्टिस छ जस्तो मलाई लाग्दैन ।’

‘सभामुखले उचित ठानेमा आफूले त्यसको निर्णय लिन सक्ने सभामुखको जिम्मेवारी होला,’ सभामुख अर्यालले भनेका छन् ।

यसअघि, श्रम संस्कृति पार्टीका सांसद हर्कराज राईले प्रधानमन्त्री वालेन्द्र शाहलाई संसदप्रति जवाफदेही बनाउन माग गरेका थिए । प्रतिनिधि सभाको बैठकमा शुरुमै बोल्दै सांसद राईले प्रधानमन्त्री शाहलाई रुलिङ गरेर संसदप्रति जवाफदेही बनाउन माग गरेका हुन् । सभामुख अर्यालले रुलिङ गर्न अस्वीकार गरेपछि श्रम संस्कृति पार्टीका सांसद एवम् संसदीय दलका नेता राईले संसद बैठक बहिस्कार गरेर बाहिरिएका छन् ।

संसदमा बोल्दै सांसद राईले भने, ‘केही दिनदेखि हामीले धेरै दिनदेखि प्रधानमन्त्रीको माग गर्दै आइरहेका छौँ । नियम १५ को २ अनुसार । सभामुखले उहाँलाई रुलिङ गरेर ल्याउन सक्नु भएको छैन । सभामुखले १५ को २ अनुसार प्रधानमन्त्रीज्यूलाई सदनमा जवाफदेही बनाएर ल्याउन सक्नु हुन्न भने नियमावलीको ३१ को १ लागू गरेर मलाई यो सदनबाट निष्काषन गरेर यो सदनको गरिमा बढाइदिनु अनुरोध गर्दछु ।’

‘यो दुइटामा एउटा म माग गर्दछु । कि १५ को २ प्रयोग गरेर प्रधानमन्त्रीज्यूलाई ल्याउनु पर्‍यो । होइन भने ३१ को १ प्रयोग गरेर मलाई आजको बैठकबाट निष्काषन गर्ने आदेश दिनु प¥यो,’ सांसद राईले भने ।

‘म आज रिसाउने वाला छैन । कराउने वाला छैन । सभामुखज्यूको मजबुरी बुझी राखेको छु मैले,’ सांसद राईले भने, ‘सभामुखज्यूको पनि बाध्यता छ । सदनको गरिमा यसरी कायम हुन सक्दैन । कि त प्रधानमन्त्रीजीलाई बोलाइदिनु पर्‍यो कि त तँ निस्केर जा भनिदिनु पर्‍यो । म अलिकति बद्मास विद्यार्थी जस्तो पनि देखा परिरहेको छु ।’