काठमाडौं । संघीय संसद् सचिवायले कुनै पनि कर्मचारी युनियन नरहेको र ट्रेड युनियन खारेज भएको सूचना जारी गरेको छ ।

शुक्रबार संसद् सचिवालयको कर्मचारी प्रशासन शाखाका शाखा अधिकृत विमल परियारले सूचना जारी गरी ट्रेड युनियन खारेज भएको जनाएका हुन् ।

सरकारले केही नेपाल ऐनलाई संशोधन गर्ने अध्यादेश, २०८३ ल्याएसँगै कर्मचारी युनियन खारेज भएको जनाइएको छ ।

संसद् सचिवालयको सूचनामा भनिएको छ, ‘केही नेपाल ऐनलाई संशोधन गर्ने अध्यादेश संवत २०८३ सालको अध्यादेश नं. ७ ले संघीय संसद् सचिवालय सम्बन्धी ऐन, २०६४ को दफा ७३ मा रहेको व्यवस्था संशोधन गरे पश्चात संघीय संसद् सचिवालय सम्बन्धी ऐन, २०६४ को उक्त दफा बमोजिम अस्तित्वमा रहेको संघीय संसद् सचिवालयको कर्मचारी युनियन सम्बन्धी व्यवस्था उक्त ऐनमा नरहेको हुँदा कर्मचारी युनियन अब अस्तित्वमा नरहेको बेहोरा सचिवालयको मिति २०८३ वैशाख २४ को निर्णयबमोजिम सबैको जारकारीका लागि यो सूचना प्रकाशित गरिएको छ ।’

यसअघिको संघीय संसद् सचिवालय सम्बन्धी ऐन, २०६४ कर्मचारी युनियनको व्यवस्था रहेको थियो । अहिले सरकारले अध्यादेशमार्फत त्यो व्यवस्था हटाएको छ ।

विभिन्न राजनीतिक दल निकटका कर्मचारीहरूको युनियन र संगठनहरूका कारण सांसद, सेवाग्राही लगायतले सास्ती ब्यहोर्दै आएका थिए । युनियन खारेज भएपछि संसद सचिवालयमा अब केही सहज हुने अपेक्षा सांसदहरूले राखेका छन् ।