काठमाडौं । नेपाल प्रहरीको केन्द्रीय अनुसन्धान व्यूरो (सीआईबी)ले धितोपत्र सम्बन्धी ऐन, २०६३ अन्तर्गतको कसूरमा हिमालयन रिइन्स्योरेन्स लिमिटेडका तत्कालीन अध्यक्ष वर्ष ५९ का शेखर गोल्छालाई पक्राउ गरेको छ ।

बिहीबार सीआईबीद्वारा जारी प्रेस विज्ञप्तिअनुसार नेपाल धितोपत्र बोर्डको प्रारम्भिक जाँचबुझ प्रतिवेदन समेतको आधारमा गोल्छालाई पक्राउ गरिएको हो । काठमाडौंको नागार्जुन नगरपालिका वडा नं.८ बस्ने हुलासचन्द्र गोल्छाका छोरा हिमालयन रिइन्स्यो–रेन्स लिमिटेडका तत्कालीन अध्यक्ष शेखर गोल्छालाई पक्राउ गरिएको विज्ञप्तिमा उल्लेख छ । शेखर गोल्छा समेतको मिलेमतोमा धितोपत्र सम्बन्धी ऐन, २०६३ को दफा ९४, ९५, ९६ को उपदफा (१) र दफा ९८ बमोजिम कसूरमा ऐ ऐनको दफा १०३ को उपदफा (३) बमोजिम थप अनुसन्धान तथा कारबाहीका लागि नेपाल धितोपत्र बोर्डको प्रारम्भिक जाँचबुझ प्रतिवेदन, २०८३ ब्यूरोमा प्राप्त हुन आएको विज्ञप्तिमार्फत जानकारी दिइएको छ । बिहीबार काठमाडौं जिल्ला अदालत, बबरमहलबाट पक्राउ अनुमति लिई शेखर गोल्छालाई नक्सालबाट पक्राउ गरी थप अनुसन्धान भइरहेको सीआईबीले जनाएको छ ।

गोल्छा अर्गनाइजेशन नेपालको ठूलो व्यापारिक घरानामा पर्छ । सयौँ व्यक्तिलाई रोजगारी दिनुका साथै नेपाल सरकारलाई उल्लेख्य रुपमा कर तिर्दै आएको गोल्छा अर्गनाइजेशन प्रतिष्ठित व्यापारिक घराना हो ।