काठमाडौं । जिल्ला प्रहरी परिसर, काठमाडौंले जेनजी प्रदर्शनका बेला कारागारबाट फरार दुई कैदीबन्दीहरूलाई पक्राउ गरेको छ ।

भदौ २४ गतेको प्रदर्शनका क्रममा केन्द्रीय कारागार, जगन्नाथदेवल, काठमाडौंबाट फरार डाँका, चोरी मुद्दाका कैदी ३२ वर्षीय सुजन रसाइलीलाई पक्राउ गरिएको सूचना अधिकारी समेत रहेका एसपी पवनकुमार भट्टराईले बताएका छन् ।

सिन्धुपाल्चोको बाह्रबिसे नगरपालिका वडा नं. ३ घर भएका रसाइलीलाई काठमाडौं महानगरपालिका वडा नं. ६ आरुबारी, सिमलटारबाट पक्राउ गरिएको विज्ञप्तिमा उल्लेख छ ।

प्रदर्शनको क्रममा कारागार कार्यालय, भीमफेदी, मकवानपुरबाट पर्खाल भत्काई फरार लागुऔषध मुद्दाका कैदी २५ वर्षीय विष्णुलाल थिङलाई पनि काठमाडौं प्रहरीले पक्राउ गरेको छ ।

मकवानपुरको बकैया गाउँपालिका वडा नं. ६ घर भएको थिङलाई काठमाडौंको कागेश्वरी मनोहरा नगरपालिका वडा नं. ६ ग्रिनहिलसिटीबाट पक्राउ गरिएको एसपी भट्टराईले बताएका छन् ।