काठमाडौं । नेपाल प्रहरीका प्रहरी महानिरीक्षक (आईजीपी) चन्द्रकुबेर खापुङ्गले भदौ २३ र २४ गतेको प्रदर्शनका क्रममा व्यक्तिगत सम्पत्ति माथि भएको आक्रमणलाई आतंकवादको शुरुवात भनेर टिप्पणी गरेका छन् ।

बिहीबार राति ईमेज टेलिभिजनसँगको अन्तर्वार्तामा आईजीपी खापुङ्गले आन्दोलनका क्रममा व्यक्तिगत सम्पत्तिमाथि आक्रमण हुनु भनेको आतंकवादको नमूना भएको बताए ।

उनले भने, ‘व्यक्तिगत सम्पत्तिको कुरा छ नी ! राजनीतिक प्रदर्शनको क्रममा व्यक्तिको निजी सम्पत्तिमा प्रहार हुनु भनेको त्यो चाहिँ आतंकवादको नमूना हो । आतंकवाद हो की भन्ने महसुस हुन्छ ।’

‘तपाईको घर सुरक्षित छैन । मेरो सुरक्षित छैन भने आतंकवादको शुरुवात हो जस्तो देखिन्छ,’ आईजीपी खापुङ्गले भने, ‘भोलि यहि क्रम रेगुलर रहने हो भनेदेखि हामीले पक्राउ गरेर कारबाही गर्दै जाने, प्रदर्शन हुँदै जाने । सोसल मिडियाहरूबाट मान्छेको दिमागमा बारुद भर्दै जाने के हुन्छ ? यो देश रहन्छ ? हामी रहन्छौँ ? समाज रहन्छ ? त्यस कारण हामी शान्त रहेर देशलाई सबैभन्दा अगाडि राखेर निर्णय गर्नुपर्छ ।’

भदौ २३ र २४ गतेको जेनजी प्रदर्शनका नाममा भएको हिंसात्मक गतिविधिमा व्यक्तिका घर र सम्पत्तिमाथि ध्वंश भएको थियो । सिंहदरबार, सर्वोच्च अदालत, प्रहरी कार्यालयहरूमा आगजनी भएको थियो । कान्तिपुर पब्लिकेशन, भाटभटेनीका साथै विभिन्न व्यक्तिगत भौतिक संरचना र सम्पत्तिमाथि आक्रमण तथा लुटपाट र चोरी, डकैती भएको थियो ।