काठमाडौं । सर्वाेच्च अदालतले बन्दीप्रत्यक्षीकरणको रिटमा राष्ट्रिय स्वतन्त्र पार्टी (रास्वपा)का सभापति रवि लामिछानेलाई कारागार पठाउने उच्च अदालत तुलसीपुको बुटवल इजलासको आदेशलाई सदर गरेको छ ।

शुक्रबार सर्वोच्चका न्यायाधीशद्वय नहकुल सुवेदी र बालकृष्ण ढकालको इजलासले सहकारी ठगका अभियुक्त लामिछानेलाई उच्च अदालत बुटवल इजलासले गरेको थुनामा पठाउने आदेश सदर गरेको हो ।

लामिछानेकी पत्नी निकिता पौडेलले लामिछानेलाई गैरकानूनीरुपमा थुनामा राखिएको भन्दै सर्वोच्चमा बन्दी प्रत्यक्षीकरणको रिट दायर गरेकी थिइन् ।

जिल्ला अदालत रुपन्देहीको आदेश उल्ट्याएर उच्च अदालतको बुटवल इजलासले लामिछानेलाई थुनामा पठाएको थियो । थुनामा पठाउने आदेशविरुद्ध लामिछानेकी पत्नी निकिता पौडेल सर्वाेच्च अदालतमा पुगेकी थिइन् । मुद्दाको किनारा नलाग्दासम्म अब लामिछाने पुर्पक्षमा कारागारमा रहनेछन् ।

सुप्रिम सहकारीसम्बन्धी ठगी मुद्दामा उच्च अदालतको बुटवल इजलासले दिएको आदेशका कारण लामिछाने अहिले रुपन्देही कारागारमा छन् ।