काठमाडौं । भारतले नेपालतर्फको सीमावर्ती क्षेत्रमा विशेष सुरक्षा सतर्कता अपनाएको छ ।

भारतको खुला सीमा नेपालसँग जोडिएकाले उच्च सतर्कता घोषणा गरिएको छ । सिमाना क्षेत्रमा भारतीय सुरक्षाकर्मीहरूसँगको समन्वयमा कडा गस्ती शुरु भएको छ ।

नेपाल प्रहरी र सशस्त्र प्रहरी बल नेपाल तथा भारतको सशस्त्र सीमा सुरक्षा बल (एसएसबी)का सुरक्षाकर्मीहरूले सिमानामा निगरानी बढाएका हुन् ।

उत्तर प्रदेशको पिलीभीत क्षेत्रमा शुक्रबार दिउँसो यलो अलर्टको अभ्यास गरिँदै सर्वसाधारणलाई सुरक्षाको अनुभूति दिलाउने कोसिस गरिएको छ ।

भारतले आतंकवादीहरू लुकेर बसेका स्थानमा पाकिस्ताविरुद्ध सैन्य कारबाही गरेपछि नेपाल र भारतको सिमानामा सुरक्षा सतर्कता अपनाइएको छ ।

नेपालतर्फ खुला सीमा रहेका कारण शुक्रबार निर्देशनअनुसार थप फोर्स पठाइएको छ । क्षेत्रीय प्रहरीसहित पीएससीका दुई टोलीहरू सीमामा तैनाथ गरिएका छन् ।

प्रहरी र एसएसबीले संयुक्त रूपमा सीमा क्षेत्रमा नियमित गस्ती गरिरहेका छन् । आवतजावत गर्ने नागरिकहरूको कडाईका साथ जाँच भइरहेको छ । पक्की सडकसँगै कच्ची बाटोमासमेत विशेष निगरानी राखिएको छ । नदी करिडोरमा पनि निगरानी कडा बनाइएको छ ।