चन्द्रौटा । संरक्षित वन्यजन्तु निलगाईको हत्या गरेको आरोपमा प्रहरीले कपिलवस्तुमा फरहान खानलाई पक्राउ गरेको छ ।

कपिलवस्तुको शिवराज नगरपालिका वडा नं. २ निवासी खानलाई प्रहरीले हतियारसहित पक्राउ गरेको जनाएको छ । खान आइतबार बिहान १ बजे स्थानीयको सहयोगमा पक्राउ परेका हुन् ।

खानको साथबाट प्रहरीले मारिएको निलगाई, हतियार लगायतका सामग्री बरामद गरेको छ ।

ईलाका प्रहरी कार्यालय कृष्णनगर तथा प्रहरी चौकी उदरपुरको टोलीले खानलाई महाराजगञ्ज नगरपालिका वडा नं. ६, सानो बुटहनियास्थित उखुबारीबाट नियन्त्रणमा लिएको थियो ।

खान र उनको समूहले बा. १७ च ८९० नम्बरको हाइलक्स गाडी, यूपी ५५ आर ६१७६ नम्बरको पीकअप, लु.५० प ४१२ नम्बरको मोटरसाइकल तथा एक भारतीय मोटरसाइकल लिएर निलगाईको हत्या गर्न पुगेका थिए ।

खानको झोलाबाट प्रहरीले ६ थान गोली, चक्कु र अन्य सामाग्री पनि बरामद गरेको छ । प्रहरीले मरेको निलगाई, शिकारमा प्रयोग भएका सवारी साधन, गोली तथा अन्य सामग्री गौतमबुद्ध डिभिजन वन कार्यालय, चन्द्रौटामा बुझाएको छ ।

निलगाईको हत्या गरेको घटनाको अनुसन्धान कपिलवस्तुका सहायक वन अधिकृत पहलमान सेर्बुजा मगरले सुरु गरेका छन् ।