काठमाडौं । परराष्ट्रमन्त्री डा.आरजु राणाले पहलगाम आतंकवादी हमलाको कडा शब्दमा निन्दा गर्दै ज्यान गुमाएकाहरूप्रति गहिरो दुःख व्यक्त गरेकी छिन् ।

शनिबार काठमाडौंको लैनचौरस्थित नेपालका लागि भारतीय राजदूतावासमा आयोजित कार्यक्रममा डा.राणाले पहलगाममा भएको आतंकवादी हमलाको निन्दा एवम् भर्त्सना गरेकी हुन् । उनले भनेकी छिन्, ‘मैले पहलगाम आतंकवादी हमलाको कडा निन्दा गरेको छु । ज्यान गुमाएकाहरूप्रति गहिरो दुःख व्यक्त गर्दै आफन्तजनमा समवेदना व्यक्त गर्दछु ।’

पहलगाममा भएको आतंकवादी हमलामा नेपाली नागरिक सुदीप न्यौपानेसहित २६ जना भारतीय नागरिकको मृत्यु भएको थियो । आतंकवादी हमलामा मारिएकाहरूको स्मरणमा राखिएको स्मारिकामा डा.राणाले फूल अर्पण गर्दै आतंकवादको विरोध गरेकी छिन् ।

परराष्ट्रमन्त्री डा.राणाले सुदीप न्यौपानेको शव तत्काल स्वदेश फिर्ता ल्याउन भारत सरकारको द्रुत सहयोग गरेकोमा भारत सरकारप्रति आभार व्यक्त गरेकी छिन् ।

‘एक विश्वसनीय छिमेकी र लामो समयदेखिको मित्रको रूपमा, नेपाल आतंकवादविरुद्धको लडाइँमा भारतको साथ दृढतापूर्वक उभिएको छ’, परराष्ट्रमन्त्री डा.राणाले भनेकी छिन् ।