काठमाडौं । परराष्ट्रमन्त्री डा.आरजु राणाले पोप फ्रान्सिसको निधनप्रति गहिरो दुःख व्यक्त गरेकी छिन् ।

सोमबार परराष्ट्रमन्त्री डा.राणाले पोपको निधनले नेपाल र नेपाली जनता मर्माहत भएको बताएकी छिन् । उनले भनिन्, ‘हामी पवित्र पोप फ्रान्सिसको निधनमा गहिरो दुःखका साथ शोक मनाउँछौं ।’

‘पोप फ्रान्सिस आशा र एकताको प्रकाशको रूपमा काम गर्ने महान नम्रता, बुद्धिमत्ता र अटल विश्वासका व्यक्तित्व हुनुहुन्थ्यो’, डा.राणाले भनेकी छिन्, ‘शान्ति, करुणा र न्यायप्रतिको उनको स्थायी प्रतिबद्धताले एउटा गहिरो विरासत छोड्छ जुन आउने पुस्ताहरूलाई प्रेरणा दिइरहनेछ ।’

परराष्ट्रमन्त्री डा.राणाले शुभेच्छुक र आफन्तप्रति समवेदना व्यक्त गर्दै भगवानले पोप फ्रान्सिसलाई शान्ति प्रदान होस् भनेकी छिन् ।

पोपको निधन भ्याटिकनमा स्थानीय समयानुसार सोमवार बिहान ७ः३५ बजे ८८ वर्षीय फ्रान्सिसको निधन भएको छ ।

भ्याटिकनको सेन्ट पिटर्स स्क्वाएरमा ‘ईस्टर सन्डे’का निम्ति उपस्थित भएको २४ घण्टा नबित्दै पोपको निधन भएको छ ।

उनले आइतवार ह्वीलचेअरमा सेन्ट पिटर्स बसिलिकामा उपस्थित भिडलाई अभिवादन गरेका थिए र ईस्टर पर्वको शुभकामना दिएका थिए ।

गत महिना उनी पाँच सातासम्म अस्पतालमा भर्ना भएका थिए । सङ्क्रमणपश्चात् उनलाई दुवै फोक्सोमा न्यूमोनिया भएको थियो ।

रोमन क्याथलिक चर्चको सर्वोच्च पदमा पुग्ने उनी पहिलो ल्याटिन अमेरिकी थिए ।

सन् १९३६ मा आर्जेन्टिनामा बसोबास गरेका इटलीका आप्रवासीहरूको परिवारमा उनको जन्म भएको थियो ।

उनी जेजूइट बने र ब्वेनोस आइरिजको आर्चविशपको पदमा पुगे । सन् २०१३ मा पोपको पदमा उनको चयनले आश्चर्य निम्त्याएको थियो । साधारण जीवनशैलीका निम्ति उनको प्रशंसा हुने गथ्र्यो । उनलाई चर्चको उदारवादी खेमामा रहेको मानिन्थ्यो ।